آسلانیمیزین وطن هارایی

 قارتال نیوز؛ دویوشون ان دهشتلی چاغلاری ایدی. دوشمان یوز باشلی اژدها تک، لئشینی آزاد اولکه یه سرمیش.هر آغزیندان وولکان کیمی اود یاغدیریردی. ظولمت فیرتینا قوینوندا حؤکم ائده رکن، شهید لرین سایی قات–قات آرتمیش، قبیریستانلار بزه- نیب، بیرلاله زارا چئویریلمیشدی. بو فلاکته سبب اولانلار چوخلو آنالاری بالاسیز، گلین لری ارسیز و نشانلی لاری نشان سیز قویموشدولار. هر یاندا قادینلارین اوخشاما لاریندا کی آغیلار و اونلارین ایچین- ایچین آغلاماقلاری اوره ک لری سارسیدیب کووره لدیردی…

ایگیدلر دوشمانین قانلی جایناقلاریله آل قانا بله شدیریلمکده، جبهه لری قانلارایله بنزه ییب، دوشمانا اوره ک داغی اولوردولار. بیرداها آنا وطن ایگیدلرین هارایا چاغیریر. گنجلر دسته- دسته آد یازدیرماقلا، او هارایا جان دئیه رک

قوش گئچه بیلمـــز بو سنگرلرین اوستوندن

قصد ائده بیلنمز بویئره لره هئچ بیر دوشمن

دئیه دوشمانین ده لینمیش باغرینا سؤز سونگوسونو سوخوردولار….

آسلان ائلدیریم تک چاخیردی ، سانکی کونلو سینه سینده دارلیق ائده رک دالغین حالدا گزیردی و بیلمه ییردی نئیله سین؟! ایکی قیلینج بیر قینا سیغمایان کیمی، بیلمیردی قاری آناسیله ، آداخلی سی نین یانیندا اولسون ، یوخسا دویوش مئیدانینا یوللانسین. بودرد، داغ کیمی اونا آغیرلیق ائدیردی.

-“داها دوزه بیلمیره م!” دئیه، خیال کیمی، یاشیل دونون چیخارمیش، آغاجلارین آلتی ایله گزمه یه باشلادی. بیردن اوزونو شهیدلر مئیدانیندا اولان بیر گنج شهیدین یاس ییغینجاغی نین اونوده گوردو… بیلمه دن یاخینلاشیب داغی – داشی دیله گتیره ن گنج شهیدین آنا- باجیسی سویله دیگی اوخشامالاری دینله دی:

گولون باغچــادا قالدی

عکسین تاقــچادا قالدی

پالتــــارلارین بوکولدو

قانلی بوخچـــادا قالدی

آسلان غم سازینی باغرینا باسیب، بوآغی لاری دؤنه-دؤنه تکرار ائتدی، آلاولی اوره ک له اورادان آرالاندی، او بو صحنه دن تاثیر له نیب داهادا فیکیر دالغاریندا قول- قانادچالیر. “گوره سن بو ووروشمالار یئر اوزوندن نه زامان یوخ اولاجاق“ دئیه اوز- اوزونه دوشونور.

او شهیدین آناسینی خاطیر لاییردکی، دردیندن فیکیره جوموب، سانکی ماوی گویلرده اوچان قوشلار ایچره ترلان بالاسینی آراییردی… بو فیکیر لر سیرا ایله دومانلی بیر کولگه کیمی گوزونون اونوندن کئچردی. او کئچن ایللرین بوچاغلارین خاطیر لاییردی. پاییز گیره ن کیمی هر یئرده چال-چاغیر، توی-دویون بساطی قورولاردی… اوزانلار، مغنی لر بو کنددن او کنده، بو شهردن او شهره کوچوب، بو شن گونلری گوزه ل هنر لریله داهادا شن لندیر یر دیلر …

ایندیسه یاس مجلس لری کونوللری کدرله دولدورموشدو. ائو تیکیلمه دن ائولر ویران اولوردو، سانکی داغلار – داشلار بوماتمده اشتراک ائدیب کدردونونو گئیمیشدیر. آسلان خلیل دئییر کس، جلیل دئییر کسمه ده قالمیشدی، بیردن نه ایسه آنلاشیلماز بیر دویغو اونو چولقادی. آجی تبسم دوداقلاریندان قاچدی، گونشین باتماغا یاخینلاشدیغینی دوشونوب، اوشاقلار باغچاسینا دوغرو یونه لدی. اوزاقدان جئیرانی گئتمکده گوروب، داها قیوراقلاندی، اونو چاغیر ماغا باشلادی.

جئیران گئرییه دونوب آسلانی گوره ن کیمی اونا گولومسه ییب،  “خوش گوردوک سنی!” دئیه اونا جواب وئردی. آسلان ایله جئیران ال-اله وئریب، یاخیندا کی بیر پارکا دوغرو قدم وورماغا باشلادیلار. پارکدا اوشاقلارین سسی سو شیریلتی سینا قاریشیب،کونول اوخشایان بیر سس یاراتمیشدی. بونا باخمایاراق، آسلان دوشونجه لره دالمیش، مبهم بیر یئره باخیردی. جئیران آسلانین چیچک تک سولغون اوزونه باخار، اونا نده ن بویله اولدوغونو سوروشار. آسلان بیتدن سیرکه یه دک اوره ک سوزلرین جئیرانا سؤیلر و جبهه یه گئتمک ایسته دیینی اونا  بیلدیره ر.

جئیران سانکی بو سوزو چوخدان دویماق ایسترجه سینه، آسلانین اللرین، برک–برک سیخاراق توتغون بیرسسله: -“اوغورلار اولسون سنه. گئت!” دئیه جیبیندن بیر مندیل چیخاریب گوزلرینده گیله لنمیش یاشلاری سیله رک:

-“ دویوشدن قاییدانادک یولونو گوزله یه جه یم”‌ دئدی. آسلان اونو باغرینا باسیب، گوزلریندن اوپدو. بیر آن آناسینین چوخورا دوشموش گوزلرینی یادا سالدیقدا، یئنه گولن بنیزی سولدو.  جئیرانین الیندن توتوب، ائولرینه دوغرو گئتدیلر.

…آنا ائوده بیر کانا پا اوزه رینده اوتوروب، تئلویزیوندا ساواش صحنه لرینه باخیر. آسلان ایله جئیران دا ساکین ساکین اونو ایزله ییرلر. آسلان آیاغا قالخیب، آناسینین یانیندا اوتورور. آنانین اللرین برک برک سیخاراق، پیچیلدار کیمی،

– آنا من دویوشه گئتمک ایسته ییرم، دئیه سویلر. آنان اؤنجه جئیرانا سونرا اونا، سونرا دوواردا کی حیات یولداشینین رسمینه باخار. گوزلری دولار.

اوغلونو باغرینا باسار. “سودوم سنه حلال اولسون، ایندی بابان دا یانیمیزدا اولسایدی، سنین له فخر ائله ردی. اوغورلار سنه!” دئیه، اوغلونودا جئیرانی دا باغیرینا باسار. آسلان آناسی نین گوز یاشلارین گورنده ” آنا  سن آغلاییرسان؟ آمما آرخایین گئده بیلمیره م “دئدی.

آنا جئیرانین اوزونده ن اوپور. سونرا پولاد اراده ایله:

” بو ایگیدلر قایداسی دیر، سون گولــله نی اوزو اوچون ساخلارلار. ” دئیه آسلانی دویوش مئیدانا دوغرو یولا سالدی.