ائلیمیزین قیریل صاندیغی

گؤزه لیم گل قونوشاق باهم اوره ك دن دانیشاق
سئوگی دن، آرزیـــلاریمدان، گَله جــك دن دانیشاق
سئوگی یوردوندا دوُنان دویغـولارا بـاش وئـرمه
یاخشی اوْلماز داهــا یاز فصلی كولك دن دانیشاق

ائلیمیزین اوجا زیروه سیندن فولکلوروموزا باخاندا، ایکی جور ادبیات گورسه نیر: مکتوب ادبیات- شفاهی ادبیات. هر ائلین اوزللییک لریندن دئمک اولار. لاب او یوخار اوزللیک لردن. گوزل لیکلردن هر زامان دئیه  بیله ریق. نیه کی فولکلور ایللر بویو، نسیلدن نسیله، بیر قیزیل صاندیق کیمی، بو گونوموزه گلیب چاتیب دی. بیر صاندیق کی یئری ائلین سینه سین ده دی. بو صاندیغین لاب او دولولاریندان، پارلاق لاریندان، لاب او ایسته دییز جه گوزل سوزلردن دانیشا بیلریق.

نئجه کی فولکلور یوردوموزون آتا-آنا میراثیدی. او انسان لاردان قالیب دی کی، ایللر بویو بو شهرلرده یاشییب لار. بوداغلاردا، بوداشلاردا، چالیشیبلار. بولاق لاریندان سو ایچیب لر، یاماج لاریندا آت چاپدیربلار، دره لرینده، ناخیر گزدیریبلر، داوار اوتاریب لار، چول لرینده جوت سوروب لر، اکین اکیب، اکین بیچیب لر، دولویا دوشوبلر، قارا باتیب لار، ساز ناغارا چالاراق، ماهنی اوخویوب لار، آنالار بئشیک لر آسیب لار، لایلا لار دئییب لر، غربته گئدیب لر، چتین لیق لر گوروب لر، بایاتی لار دئییب لر، وطن یولوندا اوغول لار وئره رک آغی لار قوشوب لار.

هر بیر ائلین سینه سینده، بیر قیزیل صاندیق وار، بو قیزیل صاندیق لاردا، آتالار سوزو کیمی لعل لر جواهرلر، تاپماجالارتک پارلاق اولدوزلار، ها بئله بایاتی لار تک اینجی مرجانلار وار. دادلی دوزلو ماهنی لار، شیرین شیرین ناغیل لار وار نوغول لار وار. بو صاندیق لار بیزیم واریمیز، بلکه ده ائل وارلیق لاریمیزدی. اولاری قورویوب اوشاقلاریمیزا تاپشیرمالییق. آتالار سوزو و مثللر رنگارنگدي. اولارين هر بيرينده بير مطلب  گيزلنير آتا‌لار سؤزلری و مثللر قدیم نن  یول آلیب گلسه ده همیشه معاصيردیر و معاصير سسله­نیر. ائل اوبامیز آتا‌لار سؤزلرینی و مثللری اؤز قلبینده، شعوروندا یاشا‌دیر. آتا‌لار سؤزلری بولاق کیمی چاغلاییر. آتا‌لار سؤزلری معیشته مؤحکم داخیل اولموش، دیلدن دوشمه‌ین، کلاملاردی. آتا‌لار سؤزلری ائل اوبانین  دونیاگؤروشونون زامانا، زامانین دا  بشر اؤولادینا وئردیغی عبرت درسی‌نین هامی طرفین‌دن قبول و تصدیق ائدیلن نتیجه‌سی‌دی.

یازار: اکبرسعادت