او گون، او گئجه، دریا یولوندا…(بخش اول)

ایلاهی هر آن سن بیلن یاخچی دیر. آمما بیر میللتی آت بئلیندن یئره سالیب نامردلر اَلینده اسیر ائدیب محو ائتمک نه دئمک دیر؟

دریامیز گول اولموشدو، گولوموز قورویوردو. کیم بیلیردی بئله اولاجاغین!!! اولاجاغینی بیلمه‌ین‌، نئینه‌یه بیلر. تکجه باشینا دویه ر. دیزین قوجاقلار… دئییرلر گؤلدن دوز یاغاجاق، شور سالاجاق، آغ یاخاجاق، یئرلری یاندیریب یاخاجاق. بومب اولاجاق.

باشقا جور گله‌جه‌یه یاشاماق، بیر نسیلدن باشقا نسیله دورومو یاخشی‌لاندیریب، اونلارا یاخشی دوروم ساغلاماق‌لار اولور. بو یاشاماغا یاخشی گورمک گره‌کیر. ال‌لریمیزده اولان‌لاری ساخلاییب، اونلارا آرتیریب اوشاق‌لاریمیزا پای وئرمک اولور. بو جور گله‌جه‌یی دوشونن‌لر میللت‌لرینین آغالیق‌لارینی ساغلایا بیلرلر.

شورگولوموز قوروموشدو، آمما شور دریامیز قالیردی. گاهدان اورمو دریاسینا گئدیردیک. یادیما گلیر بیرینجی دونه اورمو دریاسینا گئتدی‌ک‌ده، دریا دالغالانیردی، داها دوغروسو کورپونو سووشوب گئتمیشدیک، دریانین قوخوسونو کورپودن چکیردیک.گوز ایشله‌دیک‌جه گوی ایدی گوم گوی.

دریا قورتولان ده‌ییل ایدی دئیه‌سن. دریایا آچیلان هانسی یئر اولدوغو یادیمدا ده‌ییل، آمما هر نه ایدی، اوردا آدام چوخ ایدی. قالاجاق یئرلرده یئر یوخ ایدی. هر کس گولوردو. گولو گیریب، چیخیب، گونه‌شه سریلیردی. خانیم‌لارلا آقالارین یئرلری ده آیریدی.

دریا یولوندا هر یئرده، قویو وورموشدولار. هردن قورخوردوم، اولمویا قویولار دریانی قورودا. آخی بیزیم کندین قویولاری شورگولو قوروتموشدو،‌ تورپاق‌لاری یاندیرمیشدی. چولون گوتورن، قاچمیشدی. اوشاق آغلی ایدی، دریا قوروماز ایدی. قویولارین سویو آزالدیقجا اَکین یئرلرینه سو چاتمیردی. باشلامیشدیلار، سولارین قاباغین کسمه‌یه، هر یئرده سویون قاباغین کسیردیلر.سونرا ائشیدیردیک، دریا اورمولا، تبریزی اوزاق سالیب بیر-بیریندن، یاخین‌لاشمالی ایدی‌لار. دریادان کئچیت یول ووروردولار. ایلدن ایله، قورولوق اولوردو. قاباقکی یاغین‌لاردان خبر یوخ ایدی. سولار آزالیردی.

آردی وار

اکبر سعادت