ایگید لرین سئر داشی / بیرینجی بولوم

قارتال نیوز _ کاظیم خان بئی،مشهدی ریضا اوغلو ۱۲۸۰گونه ش ایلی اورمونون قوشچو کندینده دونیا یه گه لدی. قوشچو انزه ل محالینین ان مهم کندیدیر و ایندیلیک ده شهره چئوریلیب. خان گوزه ل سسه صاحبیدی کی آتاسیندان ایرثه آلمیشدی و آذربایجان آشیقلاریندان ساییلاردی.بیرینجی دونیا ساواش لاری اسناسیندا ۱۳۲۵-۲۶ایلله رینده ایلک اونجه حاج ناظیم آقا ایله بیرلیک ده اونجه عوثمانلی اوردوسویلا کی کوردله ره یاردیم ادیب و اونلارین الین اهالینین قتل و تالانین دا آچیق قویموشلار چاتیشمایا گریر.

بو ساواش جامال آباد ، قوشچو و گلوان کندلرینده باش وئریر.

مارشیمون وان جیلولارینین باش چی سینین قتلینده ن سونرا کی سالماسین کوهنه شهرینده سیمیتقو نون وسیله سیله باش توتدو و اورمو، سالماس شهرله رینده ارمنی و جیلو بیرلیک لرنین وسیله سیله بویوک بیر سوی قیریما تورک اهالینین علیهینه مونجر اولدو، کاظیم خان و توفنگ چیلری انزل ماحالینین اهالیسین قیرخلار قالاسینا ییغیب و دوشمانین قتلین دن ساخلاماغی باشاردی. دفعه لرجه ارمنی و جیلو بیرلیک لری بو طبیعی یاریم آدانی چنبره آلیب و توپ و آغیر سیلاح لارلا قوشاتماغا چالیشدیلار آمما ساواشی قازانا مادیلار. کاظیم خان بیر داهی سرکرده و سرداریدی و بو داشین ایچینده توپ ، توفنگ و چشیتلی بومبالار اوز باشاراجیلیقیلا ایعمال ائدیردی. عوثمانلی اتحاد اسلام اوردوسونو دیخالتیله ارمنی – جیلو بیرلیک لری دارماداغین اولوب و اهالی حتمی اولومدن قورتولدولار. بو دفعه اونلارین گتدیین دن سونرا کورد اشقیاسی اونلارین یئرینه گئچیب و سیمیتقونون سرکردله لیگیله اورمو ، سالماس و گونی آذربایجانین توپراقلاری و اهالیسی بویوک بیر موصیبته دوچار اولدولار. بو کز بیر داها اهالی و اونلارین قهرمان باشچیسی قیرخلار قالاسی ( کاظیم خان داشیندا ) ییغیلیب و دوشمانی گری پوسگوردولر.

اقبال السلطنه اورمو والیسی اوز دیرایت سیزلیگیله کاظیم خانی سیمیتقویا تحویل وئرر و بئله لیکه او بویوک جنگاور سیمیتقونون اسیری اولور ، آمما بویوک بیر جسارت له دوشمانین الیندن قاچیر و سیلاح سیز و آج اوزونی چهریق قالاسیندان کاظیم خان داشینا یتیرر..

ریضاشاهین ظهوروندان سونرا و سیمیتقونون قتلیندن سونرا دولت بیرلیکلری بو قهرمان و میلی شخصیتی حصره توتوب و تسلیم اولمایا چالیشیرلار، آمما کاظیم خان ریضا شاهین ماهیتین تشخیص وئره رک قیرخلار قالاسینا قاییدیب و تحصون ائدر. بیر گجه قالادان قاییقلار واسیطه سیله شرفخانا بندرینه گئدیب و گجه دن ایستیفاده ائدرک سپهبد جهان بانی نی گئجه یوخودا غافل گیر ادیب و اوز اوستون نیظامی ذکاسین گوستریر. آنجاق بیر اوزون موددت محاصیره و آجلیق و بیر چوخ چتینلیکدن سونرا ۱۳۴۲هجری قمری ایلینده سرلشکر امیر طهماسبی اوردوسو طرفیندن چنبره آلیندیغی زامان،اوزونون دوزتدیگی بومبانین پاتلاییشیلا بیر حادثه ده شهید اولور. کاظیم خان بیر قهرمان کیمی اولور و قیرخلار قالاسیندا دفن اولونور.