بیر ایستیکان سو

قارتال نیوز: بیز حایاتیمیزین سندن آختیغینی تازا بیلمیشیق. سنین بیزه آنا اولدوغونو تازا اویرنمیشیق. دئمک عومروموز سنه باغلییمیش.

سن اولماسان بیزده یوخ اولاریق. ایندی ، اوز اوشاقلاریوین گوزلری اؤنونده سوزسوزلوقدان چابالایب جان وئرمکده سن!بونا نئجه دئزمک اولار.

دوزه بیلمه دیم منده. نه الیمدن گله بیلر کی؟ سنه بیر بارداق سو گتیریردیم. یولومو کسدیلر، یولو باغلادیلار، سنه چاتا بیلمه دیم، بارداغی آلیب سیندیردیلار.

دئمک سنه سو وئرمک یاساق ایمیش. مگر بورا کربلایمیش دئمک! باغیشلا منی دنیزیم، گوز یاشلاریمدان باشقا بیر شئی سنه سونا بیلمه دیم!

چیغیریرام، باغیریرام امما سسیم بیر یانا یئتمیر. حسرتینن چکدییم هئی لر اوره ییمی گوینه دیر، قه هر دن بوغولورام چاره سیزلیییمه! دوشونورم بئله ال-آیاغسیزلیغی هاردان قازاندیم من. منیم آتا- بابالاریم حاق یولوندا قیلیبج قالدیران، دویوش میدانیندا داییم بایراق لاری دالغالانان، آت چاپان، دادا چاتان اولوب لار. آتیلا بابام آت اوسته دوغولوب، اولو بابکیم دوغرانانا قدر دویوشوب امما دوشمه نه باش ایمه یب؛من سه قانادسیز قوش کیمینم، آتالاریم قارتال اولدوغو حالدا. بو غیرت سیزلیک، سسسیزلیک، مظلوملیق، باش آشاغیلیقی هاردان قازاندیم من!

اورمو گولونون بو دوروما دوشمه‌یی، بو گونون ایشی دگیل، چوخدان دیر اورمو گولونون قوروماق پروسه‌سی باشلانیلیب، آمما ایندی سسله‌نیب(داها دوغروسو هامی گوزون یومموشدو، بلکه ده گورنمیردی)

اورمو گولونون تکجه بیزیم یئرلرده یاشایان آدام‌لارین مسئله‌سی کیمی اوزونو گورسه‌دیر. هر دن خبرلرین ایچینده بیر خبری گئدیر، آنجاق بیر خبر کیمی باشقا خبرلرین ایچینده باتیب گئدیر. ائله بو اوزدن بوردا اولان تیتیزلیک، باشقا یئرلرده گورونمور. ائله بو اوزدن، اورمو گولونون قیرغیندا یئرلردن سئوای، آذربایجانین باشقا یئرلرین ماراق‌لاندیرانمیر. یادیما گلیر، آمریکانین بیر نفت لوله‌سی دنیزده پاتلاماغی دونیانین ماراغینی قازانمیشدی. دونیا بیر چوخ اولکه‌لرینده بو مسئله چوزوم آختاریردیلار.

اورمو گولو آشیقلارین سوزلرینده جوشوب داشاردی.گئجه لر داها گوزل منظره لر یارا نیردی چونکو یولچولار اود تونقارلاییب اونون چئوره سینده یئغیشارکن ، آشیقلار ، سازلارین سسلندیریب ، چالقیچی لار، چالقی آلت لرین دیلندیریب و بونلارلا یاناشی موغنی لر اوخویوردولار و اورموگولونون اطرافینداکی موسافیرلرده ذوقه گلیب و ایله نیردیلر . موغنی لرین و هابئله ماهنی اوخویانلارین سوزلرینده ، اورمو دنیزی بیر پارلاق دان اولدوز کیمی شعرلر و سوزلرده  گوزه و قولاغا چارپیردی. بئله کی من خاطیرلاییرام اورمو گولونون یام یاشیل چئوره سنیده بئله بیر تورن لر ، ایلنجه لر و ها بئله اونون  شفاجیل خاصیت لریندن فایدالانماق ان چوخو ایکی آی زاماندان آرتیق ایره لی گلمیردی چونکو هاوالار سویوقلاشیب و پاییز فصلی آردیندایدی. بئله لیک له بو شنلی یین باشلانغیجی یاز فصلین سون آیی نین ۱۵ – جی گونو و قورتولوشودا یای فصلی نین اورتا آیی یعنی قورا بیشرن آیین ۱۵ – جی گونو ایله قارشیلاشیردی. ائله کی بو ایکی آی بیتیردی و هاوالار سرینله شیردی دییه ردیلر قویروق دونوب یا دولوب یا دوغوب دور. بوگوندن سونرا داها اورمو گولو ان آز یولچولارلا  قارشیلاشاردی …

گوزل بیر گونلریدی.هر داریخاندا عایله ینن بیرلیک ده اورمو گولون گورمه یه تله سیردیک.آغ گمی لرده گئچمیش خاطیره لر یادیما دوشور.اوندا کی ایکی اولکه نی گمیینن گزه ردیک.اما ایندسه هر اتوبوس نان اوردان گئچدیکجه دوزلو یوللار اوره ییمی ده لیر.دورنالار اورمو گولون قوناق لاریدی.جیرانلارین،حیران باخیشلاری ایندیسه یئرین بوش داغ داشا وئریب.

اوره ک لره بیر دونیا سئوینج قوناق ایمیش.اولکه مین یاشیل گونلری دوزلاردا قالدی.مین لرجه آرزی لاریمیز اوره ک لریمیزده سولدی.

آیری باخیمدان آذربایجانیمزدا یئرله شن  اورمو گولو(اورمو شهرینده)او زامان لار_ سولدوز ، قوشاچای ، سالماس، خوی ، تیکان تپه، سایین قالا و تبریز آشیقلاریندا بو اولکه یه قوناق گئتیرمیشدیر. و اونلار هله ده اورمو دنیزی نی اونو تماییب و ایفا ائتدیک لری چاغلاردا، اورمو دنیزی له ایلگیلی ان گوزل و ماراقلی قوشمالاری ، گرایلی لاری ، مخمس لری بایاتیلاری و … تویلاردا، توپلانتی لاردا و باشقا باشقا تورن لرده اورکدن دیله گتیریب و ائشیدن لری ، گورن لری و دینله ین لری ماراقلاندیریب لار.او جمله دن یئری وار کی دئییم: . قوچامان خالق شاعیری رحمت لیک دده کاتیب اورمو دنیزی له ایلگی لی  اوزل ایز یارادیب دیر کی آدی « اورمو گؤلو » منظومه سی دیر.او و مین لرجه شاعرلریمیزین سوزلرینده هله ده اورمو گولو بیزلر عزیز دیر.بیز هله ده بونا اینانیریق کی بیر گون اورمو گولو یئنه جوشوب داشاجاق.بویوک شاعریرمیز عباس بارز یاخشی دئییب کی:

“سو گلن آرخا دئییب لر گینه بیر گون سو گلر”.

بوگون لر اولکه میزده یاشایان اینسانلارین اوره یی چوخ دولوب. گوره‌سن نییه دوغرو ایش گورمک یئرینه یالان وعده لرله اویدورما سوزلرله خالقین باشینی آلداتماغا ….. بیری دئییر، اویدو شکیللری اورمو گولونون دولماغا باشلادیغینی گوستریر. بیری دئییر آرازدان سو چکیریک- قارشیداکی دئییر “اوندا موغان سوسوز قالار” او بیری دئییر خزردن سو چکیریک، او بیری دئییر گورجوستاندان سو آلیریق، بیر باشقاسی دئییر گوناه اکینچیلریندیر، او بیری دئییر گوناه هاوا-نیندیر. یوز آغیز بوش-بوش سوز سوهبت، بیر آددیم عمل یوخ.بیز یوباندیق.نئچه ایللردیر کی الی بوش تکجه وعده وئریرک.آما داها گوره ر.بوندان آرتیق گئج قالماق بیر بشریت فاجعه سی یولا سالاجاق.کاش بیزیم مسئول لار بونا دوشون سون لر.

کوچوروب حاضیرلایان:اکبرسعادت