تویوق

۱۱ آی بوندان قاباق آرواد چوخ دئییب من آز ائشیدندن سورا بیر گون گوجومو قولوما ییغیب بیر تویوق آلدیم. اونو بیر نایلونا قویوب، توولایا توولایا ائوه گیردیم. یئدی ائولی قونشو دا بیلدی کی من تویوق آلمیشام.
……………………..
جناب- ی تویوغو چوخ ائحترام نان بیزیم آرواد سویوندوردو، یویوندوردو، تازا کوت شلوار گئییندیریب یخچالا قویدو.
بیر ایکی هفته مونتظیر اولدوم، قارینا وعده وئردیم کی، بیله خره بوگون – ساباه تویوق یییه جه ییک، آما خبر اولمادی. بیر- ایکی دفه ده خانیمین یادینا سالدیم، بویوردولار تلسمه بیشیره رم.
خولاصه من چوخ دئدیم، او آز ائشیتدی.آخیر دفه بویوردو ساخلامیشام قوناق گله.یاواش یاواش تویوق یادیمیزدان چیخدی.خولاصه تویوق بیزیم یخچالدا، مورغداری دان چوخ یاشایاندان سورا ووردو بیر قوناق گلدی…خانیم تر تله سیک گئتدی تویوغون سوراغینا.بیر ساعت اله شندن سورا اونو بوزلارین آلتیندان چیخارتدی.بوش یخچال بیر خالوار بوز، ائله بیل تویوغو قوطب دا قویلامیسان.دئیه سن قوناغیندا ایکی قیرانلیغی دوشدو.تویوغو گورن کیمی گوزلری ایشقلاندی.دیل دوداغی نین آراسیندا یالانان دئدی:
اوزوزو چوخ زحمته سالمایین ها
دئدیم:
خاهیش ائلیرم، ائله بیر ایش گورومور.ایندی هامی نین یئدییی تویوق دی دا.
آنجاق باشینیزی چوخ آغریتماییم، قابلامالار آسیلدی، تویوق پیلوو بیشدی.تویوغو چینی بولوتدا بزه دیلر، ائله بیل گلین چیخاجاق.سوفره سالیندی.هر زاد دوزولدو.
هامی مونتظیر آماده اوتوروب، بیله خره تویوغو دا گتیردیلر.ائله یئره قویماق همین هله قوناق قاشیغین تاپمامیشدی.بیزیم اوشاقلار ائله هجوم ائله دیلر کی ائله بیل اون ایل تولکولوک دووره سی گوروبلر.
تویوغو یئدیلر، داغیتدیلار، قوناغا بیر آز دری بیر آز بویون قالدی.آرواد دا آشپازخانادان تئز تئز دئییر:
باغیشلایاسیز ها، ائله بیر شئی بیشیرمه میشم.
یازیق قوناق هیرسیندن بئش آلتی لیوان سو ایچدی.اودقونا اودقونا بیر ایکی دفه دئدی: خاهیش ائلیرم. هله گوزو قالیب اوشاقلارین بوشقابیندا، ائله ایسته دی او بویوندان بیر آز دری دورونو چکسین، اوشاقلارین بیری سسلندی:
بابا او بویونو وئر من گمیریم دا.
ایندی اوزومو توتموشام قوناغا ساری دئییرم:
سن الله آزلیغینا باخما چک
قوناق گوردو بیر آز دا یوبانسا او دری لری ده اوشاقلار یییه جه ک، تله سیک باشلادی… دیل- دوداغی نین آلتیندا بیر زاد دئییردی. دئییه سن تشکور ائلیردی.
آنجاق شامی یئدیک.قوناغین قاش قاباغی یئر سوپوروردو. اوشاقلاردا شئر کیمی اویناییردیلار.بیر شیرین چای قوناغین قاباغیندا بوز باغلامیشدی.فقط ایجازه ایسته ییردی گئتسین.منه ده شعر هوه سی وئرمیشدی.
دئدیم شام کی یئدین.قوی بیر شعر اوخویوم گئت.
بو شعرنن قوناغی یولا سالدیم:
بیرده قیسمت اولا تویوق آلاق بیز
یئییه نده سنی ده یادا سالاق بیز
قوناق خوش گلدین، سن گئت سالامات قال
قوناقلیق گئجه سین بیرده یادا سال
بیرده سنین بیزه یولون دوشنده
دیققت ائله دوشمه بنده کمنده
بیر ساعت قاباقدان چیرمالا قولون
گوزلمه یئمکده کیمسه نین یولون
قوناق خوش گلدین، سن گئت سالامات قال
قوناقلیق گئجه سین بیرده یادا سال

یازار: اکبرسعادت