عاشیقلیغین فلسفه سی/ عاشیق نه لر دئمه لی دیر؟

 قارتال نیوز، موسیقی تکجه چال-اوینا دگیل کی!! موسیقی میز اونلاردان علاوه همده ائلیمیزین دردی، کدری، سؤزودور. عاشیغین اؤزونه بیر دوروشوغو واردی. باخساز نیه عاشیقلار قهوه ده اوخویوبلار؟ نیه آیاق اوسته اوخویوبلار؟ بونلار هامیسی عاشیغین رسالتین گؤستریر. عاشیق او یئرده اوخویارمیش کی، نئچه نفر بیر یئره توپلانا و او ائلیه بیله سؤزونو ملته یئتیره. آیاق اوسته دورماغیدا، بونو نشان وئریرکی عاشیق همیشه آماده دیر.

عاشیقلیقدا اول سسدیر، سونرا سؤزدور، سونرادا ساز. دوزدور هره سی گرک اؤز یئرینده اولا. آما سس اؤنملی دیر. عاشیق اولاندا گرک، ائل ایچینده آغیر-سنگین اولا. گؤزو پاک اولا. هانسی ائوه گئتدی، او ائوی اؤزوندن بیله. یوخسا ائله دلیلدن، نصیحتدن، عبرتدن دئیه سن و اؤزون عمل ائله مه یه سن، اولارسان عالم بی عمل. عاشیق گرک خالقینا معرفتدن، حقیقتدن، نصیحتدن دئیه و اؤزوده اؤز سؤزونه گرک عمل ائله میش اولا. حتی بو صنعته مذهبی باخیش نان باخساق، بیر عرفانی صنعتدیر. عاشیق نه قدرده کیچیک اولسا (یاش باخیمیندان،) ۹۰ یاشینداکی کیشی اونون نه اوخودوغونا گؤز تیکر، تا اوخودوغو سؤزلردن، دلیلدن، حقیقتدن بهره لنسین. بو قوجا کیشی او آز یاشلی آشیغین اؤزونه یوخ، صنعتینه دگر وئریر. یعنی بو صنعت ائله صنعتدیر. فضاسی ائله دیر. بؤیوک بیر مکتبدیر. علم دیر.

اوچ نوع عاشیق داستانی واریمیزدیر.

۱-حماسی داستانلار- کوراوغلو داستانی. بو داستاندا قهرمانلیق وار.

۲-محبت داستانلاری وار. جماعتین صمیمیتیندن، دوزلوگوندن دانیشیر.

۳-سئوگی داستانلاریدا وار. عشق و معشوقدور.

نئجه کی آدام گئدیر بیر فیلمه باخیر و آخیردادا او فیلمین نتیجه سی اولور. بو داستانلاردا اونلارا تای. بونلارین نتیجه سی وار و گرکده بئله اولا. بو داستانلار هامیسی ائلیمیزین یاشاییشیندان آیریلیب و ائل ایچینده اولان مسئله لری نظمه چکیبدیر. بو داستانلارین بیر سئریسی واقعیتده اولماسادا، بیر تعدادی واقعیتدیر.

قدیم  دئیه ردیلر، هرکس خسته قاسمین بوتون سؤزلرینی بیلسه دا هئچ یئرده معطل قالماز و آیری سؤز-صحبته احتیاجی اولماز. کی بو حقیقت داستاندیر. یا گرگرلی محمد وار. اولولو کریم وار. عباس توفارقانلی وار. بونلار حقیقی دیر. بیر تعداددا وار، قاراناغیل دیلار. افسانه و رویادیلار. قاراناغیللاردادا حقیقتدن دانیشیلیر. عبرت وار.

دونیا ( خسته قاسیم)

گل بیر سندن خبر آلیـــــــم

سلیماننان  قالان  دونیــــــا

ازلی گول کیمی آچیــــــــب

آخیریندا  سولان دونیـــــــــا   

****

ده گوروم نه یه طالیبسان ؟

درسینی کیمنن   آلیبسان؟

نیچه مین یول بوشالیبسان

نیچه مین یول دولان دونیـــا

****

بو دونیا فانی دیر ، فانـــــی

بو دونیادا قالان هانــــــــی؟

داود اوغلی سلیمانــــــــی

تخت اوستونن سالان دونیا

****

خسته قاسیم قالیب ناچار

بو سیرری بس کیملر  آچار

گلن قونار ، قونان کوچـــــــر

هئی سالیرسان تالان دونیا

کوچوره ن: اکبرسعادت