قاراپاپاق لاردا توی عادت لری

قارتال نیوز/ سولدوزدان سؤز گلنده، قاراپاپاقلاری شرح و ایضاح ائتمک اولماسا/ اولماز…نئجه کی بو ایکی کلمه بیر-بیرینه باغلی اولوبلار و هره سی اؤز ایچینده و آرخاسیندا دونیالارجا مفهومو داشیان بیر کلمه دیلر…و بیر آیریلماز قسمته چئوریلیبلر.

بیر طرفدن ده / قاراپاپاق ائلی چوخ بویوک فرهنگه صاحبدیلر ویوردوموزون باشا-باشیندا بوگون/ قاراپاپاقلارین فولکلورو و فولکلورلارینا باغلی قالماقلاری دیللرده دئییلیر و فولکلورچولار ایله آراشدیرماچیلارین دیللر ازبری دی…

گونده لیک یاشام، ائولنمک، ائلچی لیک، بایرام دبلری، یاس مراسملری، یاللی لار، اویونلار و قاراپاپاقلارین گؤزل گئییملری/  اونلارین سئویملی فولکلورونون دیبی بوجاغی بیلینمه ین  و بیر درین دنیزین سانکی ساحلی دیر و افقلارا باخدیقجا / بو ائلین فولکلورونو حس ائلیریق …

سولدوزدا ائولنمک و عائله قورماق اوچون قاراپاپاق ائلینین آراسیندا گوزه ل و سئحیرلی قایدا و کئچمیشدن قالان بونلارا باغلی عنعنه لر وار

باخمیاق کی ایندی بعضی آیری – آیری قایدا و عادت لر و دبلر، قاراپاپاق ائلینده توی مراسیم لرنیه داخل اولوب و کئچمیش عنعنه لره ده تأثیر قویوب و یا گاهدا اونون شکیلین دئیشیب دی… اولارین اصیل دبلری همیشه قالارگی دی و هر زامان یاشاماق دادی….

قیز به ینمک :

کئچمیش زامانلاردا قاراپاپاق ائلی نین آتا، آنالارینین آراسیندا بیر عادت واریدی کی عیبارت ایدی بوندان:  تویلاردا یا آیری شادلیق لاردا، ‌یاس مراسم لرینده، ویا چای کنارلاریندا پالتار یوماق بهانه سی ایله (کی ایندی بئله بیر ایش اولمور) و خانیم لار بیر یئره یئغیشاندا، اوغلانین آناسی و یا باجیسی فورصت دن ایستیفاده ائدیب و اوز گنج اوغلانلارینا، قیز بیه نیردیلر و بونون دالیجا/ به ینمیش قیزین،‌ ائودارلیغیندان،‌ آشبازلیق، اخلاق ایله کئچینمه سیندن و رفتاریندان تحقیق ائدیب، گوزه لیک ایله نجابتیندن سوراغ آلیب و هامیسینی بیرلیکده، اوغلانا دئیرمیشلر، سونرادا قیز و اوغلانین بیر- بیرلرینی گور مه سی ایچون تویلاردا یادا بایراملاردا ایمکان یارادیردیلار. اگر بو گوروشمه لرین نتیجه سی سئومک  اولسایدی،  سونرا ائچیلیک رسمی انجام تاپیردی.

ائلچی لیک :

ایشین باشلاماسیندا اوغلان طرفی بیر آغ ساققال و یا آغ بیرچک وحورمتلی شخصی ائلچی عنوانیندا قیز ائوینه گوندرردیلر…بو شخصده اوغلانین او قیزلا ائولنمک آرزوسونو قیز طرفینه بیان ائده ردی، اگر قیز عائله سی طرفیندن مثبت جاواب وئریلسیدی، سونرا رسمی ائلچی لیک گونو معمولن دوشنبه یا جومعه آخشامی گونلری تعیین اولوردو.

ائلچی لیک مراسیمینده شرکت ائلمک اوچون، نئچه نفر آغ ساققال و قوهوم آداملاری، قیز و اوغلان طرفیندن، قیز ائوینه گئدردیلر…

بو مجلسیده اوغلان طرفیندن تعیین اولونان آغ ساققال، او مجلسیده احتراملی بیر سوز ایله رسمی شکیلده اوغلانین قیزدان ائلچیلیغین، قیز طرفینه اعلان  ائلردی.

نهایت ده/  قیزین عائله سی او مجلسیده یا نئچه گوندن سونرا اوز جوابینی اوغلان طرفینه اعلام ائلردی. اگر جاواب مثبت اولسایدی، ایکی طرف عقد گونون و اونون ساعتی و زامانی بارسینده، هابئله کبینین نئچه اولماسی، قیزیل ، گئییم و سایر قیسمت لرده توافقه یئتیشردیلر.

باشلیق:

قاراپاپاق ائلینده هئچ بیر عائله، باشلیق آدی ایله پول آلمازلار و اونو اؤز شأن لرینه سیغیشدیرمازلار. آمما سولدوزدا یاشایان آیری تورک عائله لرده توی مراسمی باشلانمامیشدان قاباق اوغلان طرفی بیر مقدار قند چای، شیرینی،‌ دویو و اَت، گلین  عائله سینه گؤندرر تا توی مراسیمینده ایشلتسینلر.

بعضن ده‌ اوغلان ائوی طرفیندن بیر مبلغده پول گلین طرفینه وئررلر. و چون توی مراسیمی قیز و اوغلان ائوینده بیر زاماندا باشلاناردی اونا گوذه بو مبلغین  بیر قیسمینی قیز ائوی، تویودا خرجلردی و قالانیدا جهیز حاضیرلاماق  ایچون صرف اولاردی.