قدیم توی لار و یاساووللار( ساغ دوش-سول دوش)

قارتال نیوز / قدیملر کندلرده هئچ زادیمیز یوخ ایدی. تکجه بیر اینک ، ایکی کئچی، بئش اون دنه تویوق، بیرنئچه دنه ده قویون. آما هئچ نه­یین غمین ائله­مزدیک. گونوموز خوش، گویلوموز شاد ایدی. آما ایندی آللاها شوکور هر نه­ییمیز واردی، بیر بئله امکانات نان، او گونلرین خوشلوغونون حسرتینده­ییق…

قدیملر احترام وارایدی، آشیغا احترام قویاردیلار. جوانلار آشیغی گؤرنده ال-آیاقلارین ییغاردیلار. آشیق رئیس پاسگاه حؤکمونده­ایدی.!!!!آما ایندی دا اوّلکی احترام آرادان گئدیب.

قدیم تویا ایکی گون قالان، گئدیب، آشیق ایله بؤیوک توی گؤرردیلر. مجلسده آشیق اولاردی، کوچه­ده ­ده بؤیوک توی چالاردیلار.

تویلار دا ۳ گون اولاردی. ۲ گونون توی صاحبی شام /ناهار وئرردی. بیر گونون ده اوزاق یئرلردن گلن­لر، قونشولارا قوناق اولاردیلار.

آشیقلار آخشام اوستو ایکی ساعات چالاردیلار. سونرا یاتاردیلار. سحر ناهاردان قاباق، آشیق گینه ایکی ساعات چالیب، اوخویاردی. بیر بگ چؤرگی وئرردیلر، بیر ده باش قیرخما چؤرگی. هر ایکیسینده ­ده پول سالاردیلار.

باش قیرخما دا بئله ایدی، بگی اوتورداردیلار، سلمانی ­ده، گلیب، اونون باشیندان یالاندان نئچه توک قوپارداردیلار (چون قاباقجا قیرخمیشدیلار)، قوپارتمامیشدان قاباق، نئچه دنه گولمه­لی سؤز دئییب، مجلسی گولدورردیلر و ملتدن سوروشاردیلار قوپاردیم یا یوخ؟. سونرا یاساووللار گلیب، بگی مجلسه گتیرردیلر. گلمه میشدن ،گلیب آغ ساققاللاردان اجازه ایستردیلر. دئیه­ردیلر، اجازه واردی، بگ مجلسه گله. آغ ساققاللار دا دئیه­ردیلر، اجازه بگ ایله­دیر، گلسین.

آشیق مجلسده اولدوغونا گؤره، بؤیوک تویون سسی گرک مجلسه گلمه­یه­یدی. سونرا گئدیب، کوچه­ده بؤیوک توی ایله اویناردیلار و جلمان گئدردیلر.

ائل آشیغی ائللرینده گزگیلن

شان شهرتلی آغیر ائللر سنین دیر

دیلین دؤنسون شنلیکلرین اوستونه

ساز قوینوندا اینجه تئللر سنین دیر

شادلیغی یای اؤلکه لره ائللره

سونا گتیر چایلار ایله گؤللره

احسن اولسون او یارادان اللره

شن ائللرده، شیرین دیللر سنین دیر

سازینی چال قوی ائللرین شاد اولسون

غصه- کدر یورد ایچینده یاد اولسون

قوی هر آهین آتش اولسون اود اولسون

سدلر ییخان گوجلو سئللر سنین دیر

داغلارا چیخ  یئندیر اوجا داغلاری

قوی داغیلسین ائلین اسکی داغلاری

او داغلاردا چیچک آچان چاغلاری

یاز گتیرن گوللو اللر سنین دیر

یاساووللار، همن ساغدوش، سولدوش ایدیلر. یعنی بگین محافظی ایدیلر.!!! چومباقلاری اولاردی. هر کیم بگه بیر سؤز دئسه­یدی،گئدردیلر، اونو دؤیمگه.

تویلاردا دا بگه گتیریب، بیر پالتو، بیر دنه ­ده لبه­دار بؤرک قویاردیلار و دئیه­ردیلر، دا سن کیشی اولدون…

آشیقلارین داستان دئمه سی توی مراسیمینه زینت وئرردی…

تویلاردا، آشیقلار داستان دئیه­ردی. تعریف چوخ آز اوخویاردیلار. ملت هامی ییغییشاندان سورا، آشیق بیر دیوان و بیر تجنیس هاواسی چالیب.و دالیسیجا داستانی باشلاردی

هردن ده آشیق بیر نفره دئییردی: بو داستانین بیر قیسمتین مجلسده اوخوسون…

یاریم ساعت یا بیر ساعت داستانی دئمخ دن سورا، آشیق دئییردی: داستانین قالانی انشاالله فلان کسین تویوندا.!!!!

و بئله لیکله داستان یاریمچیلیق قالاردی، وآیری تویدا اونون قالانینی دئیه­ردیلر…

یازار: اکبرسعادت