اوشاقلیقدا یاشام نه‌دیر بیلمزدیک، واردیر یوخ‌دیر بیلمزدیک. توی-بایرام اوشاغینکی‌ایدی. بویوک‌لر بیر یئره ییغیشاندا اوشاقلار دا بیر یئره ییغیشمالی‌ایدی‌لار. اوشاغینکی دا آتدانیب دوشمک دیر. بیری ایله اویناماق دیر. اوشاقلیغین قورخوسو بلکه، آتا-آنالارین هاچان هانسی ایش‌لریمیزدن خوشلاری گلمه‌ییب، حیرسله‌نمه‌له‌ری ایدی. حیرسلنمک‌دن ده کوتک چیخاندا قورخو یئرینه اوتوراردی. بیزیم اوشاقلیغیمیزین باشقا بیر دادی دا وارایدی. ایسته‌دیـییمیز قدر اوزوموزه تای هر یئرده وارایدی. بو دا کئفین دیزدن اولماغی دئمک ایدی.
بویودوکجه، یاشاییشین باشقا دادلارینی دا دادیردیق. سوروملو اولمادیغیمیز اوچون، یاشاییش چوخ دا چتین نظره گلمیردی. بیری بیزدن نه چورک ایستیردی نه پول. اوز الیمیز اوز باشیمیز ایدی. هله باشقالارین دا ال‌لری باشیمیزین یاردیمینا گلیردی. گنجلی‌یین ده اوز دادی وارایدی. بیری بیزدن سوروملولوق ایسته‌سه‌یدی ده اوزوموزه باغلی ایدی. سوبایلیق ایدی. سوبایلیق‌دا یان-اوره‌میزده آجی‌لار آز اولوردو. شن‌لیک‌لر چوخ اولوردو. توی‌لار، گزمک‌لر، گئجه‌لیک‌لر بول ایدی.
چورک کلمه‌سینی نه زامان ائشیتدی‌ییم یادیمدا دئییل. گوزومو آچیب، چورک گوروب، ائشیت‌میشم. چورک سوزجویونو، گئنل اولاراق اونلا سودان یوغرولوب، تندیرده پیشَنه ایشله‌دیرلر. قدیم زامان‌لار شهر ائویمیزده، تندیر دامیمیز وارایدی. هردن او تندیر دامیندا آنام چورک یاپاردی. هئچ‌نه‌یی بیلمه‌سه‌یدیم ده، چورک سوزجویونو یاخشی بیلیردیم. چورک کلمه‌سینی اوزل اولاراق، لاواشا دا ایش‌له‌دیریک.
نئچه دفه‌لر چورک کلمه‌سی منیم بئینیمده اولای‌لانیب(حادیثه‌له‌نیب). هر بیر تندیری یاندیریب، خمیر سالیب، چورک یاپیلان زامان‌لار، او گونون هر نه‌یی باشقا گونلرله فرقلی اولوردو. چورک قوخوسو، بورونا دولوردو، هر‌کس چورک رنگی توتوردو(اونا بولاشیردی‌لار)، بوتون گون، تندیر باشیندا قالینیردی، قاینالتی، ناهار، چای دا اوردا ایچیلیردی. تام بیر چورک‌لی گونو یاشاییردیم.
چورک، بیر گون هر زامانکیندان فرقلی بئینیمده حادیثه‌لندی؛ اوچو اوخویوردوم. اوخول‌دایدیق. سیناو‌لار ایدی. سیناویمیز اینشا دئییلن، بیر درس ایدی. اینشانین قونوسو دا، “نان” ایدی. “نان” کلمه‌سینی بیری اوخویاندا شکلینی گورموشدوم. بیلیردیم چوره‌یه بنزرایدی. سنگک‌ایدی. نه قدر اوزومه زور وئردیم، “نان”-ا گوره بیر سوز تاپیب یازانمادیم. یازانمادیم دئدیک‌ده هم کلمه فارسی کلمه ایدی، هم یازی فارسی یازیلمالی ایدی. دئمک من فارسی دا جومله قورماق زوروندایدیم. فارسی درسینده یاخشی ایدیم. داها دوغروسو بوتون درس‌لرده یاخشی‌ایدیم. کیلاسین بیرینجی‌سی‌ایدیم. کیتاب‌لاردا اوخودوق‌لاریم یادیما قالمیشدی. ائله اونلاردان یازدیم بابا نان داد بیلیردیم بابا نان وئرر. آمما منیم بابام قوجایدی، اوره‌ییمدن گلمزدی اونو چتینلی‌یه سالام. قرار اولسایدی بیری بیر شئی وئره او دا من ایدیم. چلیـیینی وئرردیم، آفتافانی دولدوروب وئرردیم. سو وئرردیم. هر نه چالیشدیم، بیر سوز تاپیب یازانمادیم. او ایل اینشا دئییلن درس‌ده دوشدوم اوزو ده “نان” اوستونده! دوشندن سونرا بیلدیم “نان” ائله چورک ایدی، چورک اوستونده ده دوشمک اولار!
چوره‌یی تانیمیش‌دیم، چوره‌یه فرقلی باخیردیم. بویوک‌لر ده چوره‌یه گوره چوخ دانیشاردیلار. “چورک داش‌آلتیندان چیخیر” دئییمی، آغیزلاردا گزردی. من ده اول‌لر گوجوم چاتان داشلاری قووزاردیم، آمما هئچ واقت چورک تاپا بیلمز‌دیم!
آتام، چورک قیتلیغیندان دئیه‌ردی، اوزو گورمه‌میشدی، آتاسیندان ائشیت‌میشدی. قوراقلیق ایل ایمیش، چورک ده آز ایمیش، آمما بونلارین یئرینده، سو ایله چورک وارایمیش، آجلیقدان قاچان‌لار اورا گلیرمیش‌لر، چوخ‌لاری دا یولدا اولورموش‌لر. بیر داها بیلدیم چورک اوستونده اؤلن ده اولارمیش. چورک عزیزی ایدی منه. دووالاریمیز بئله ایدی: آللاه هئچ سوفرانی چورک‌سیز ائله‌مه‌سین آمین.
بیر آز دا بوی آتدیق‌دا، چوره‌یی تانی‌ییردیم. یاواش-یاواش یئنه فرقلی تانی‌ییردیم. تندیرلر ییغیشیلمیشدی، بیز قاباقکی ائودن گئتمیشدیک، کنده ده آز گئدردیم. چوره‌یین قوخوسونو یادیرقامیشدیم. چورک چیخارتماق اوچون درس اوخومالی ایدیق، ائله دئییردیلر. قاباقجا چوره‌یین یاپماغی‌نی بیلسم ده، ایندی چیخارتماغین اویره‌نیردیم. چورک چیخارتماق دئمک، گره‌ییم اولان هر نه‌یی الده ائده بیلمه‌ییم اوچون، پول قازانماق دئمک ایدی. چورک چیخارتماق، آنلامی پول تاپماق آنلامی‌لا بیری ایدی‌لر. یاخشی چورک تاپماق اوچون، درس اوخومالی ایدیق. دئیه‌لر دئمی‌یه‌لر یاخشی درس اوخویوردوم. دئمک من چورک چیخاردا بیله‌جک ایدیم!.
درس‌لر، اوز فضاسینی یارادیردی. ماراقلی اولان‌لار، هر گون بیر شئی‌لر اویره‌نیردی‌لر. وئریلن کیتاب‌لاردان باشقا کیتاب‌لار دا اوخونوردو. یئنی باشلادیق‌دا بیر شئی‌لر آلینماسا دا یاواش-یاواش آلینیردی. آنجاق یئنه هر نه توزاناقلی گورونوردو. پولو اساس بیلن دوشونجه‌لر ده وار ایدی. وار ایدی دئدیک‌ده، دئیه‌سن هر کس اساس بیلیردی، آنجاق فرقلی یون‌لردن. یاواش-یاواش ساغ-سول دئییلن گوروش‌لری ده سئچه بیلیردیک.
درس‌لر بیتمیشدی، چورک‌دن خبر یوخ ایدی! منه تای‌لار(درس اوخومویوب، ایش دالیسیجا گئدن‌لر) دوزن‌لرین قورموشدولار. من ایسه بو شهردن او شهره چورک تاپماق اوچون، درس اوخوماغا گئدیریدیم. چورک داش آلتیندا دئییل ایدی، چورک اوچون داغلاری قالدیرمالی اولوردوق. منه تای چورک دالیسیجا اولان‌لار بول-بول ایدی‌لار. منه تای سورگون دوشن‌لر، هره‌سی باشقا بیر یئرده یورد سالمیش‌دیلار. بیزیم شهردن گلن‌لر، آذربایجانین باشقا یئرلریندن گلن‌لره گوره آز ایدی‌لار.
چوره‌یین باشقا ایشله‌وینی ده گورودوم. سورگون سالماق.
سول‌لار چورک‌دن دانیشیردیلار. یاخشی دانیشیردیلار، ساغ‌لار دا چورک‌دن دانیشیردیلار، اونلار دا یاخشی دانیشیردیلار. دانیشان‌لار یاخشی دانیشیردیلار. دانیشان‌لارا باخاندا اوزومله فرقلی گورودوم، اونلارین چورک‌لری وار ایدی. دانیشدیق‌لارینین ندنی آرتیق چورک قازانماق ایدی. منه تای‌لارین چوره‌یینی قازانیردیلار. سوز ده منه‌تای‌لارا چورک ده وئریردیلر.
سون ایل‌لرده چورک یئمک ده آزالیب، دئیه‌سن چورک قیتلیغینی، باشقا یئمک‌لرله دولدورمالی اولوب‌لار!
چورک، هله ده دالینجا قاچیرام.
شیرین‌لیک‌له باشلانان یاشاییشا، اولوم‌لر له آیریلیق‌لار آجی‌لار قاتیر. آجی‌لارین تکجه آجیشدیرمیرلار، هردن داریخیر. اوزوندن داریخان، اوزگه‌دن قاچار. آجی‌لار تکجه ایتیرمک‌لر اولمور. هردن خیـیانت‌لر اولور، گووه‌نسیزلیک‌لر اولور. گووه‌نسیزلیک‌لر اورتایا گلدیک‌ده یاشاییش‌لا باریشانمیرسان. زامان سوووشدوقدا اویره‌نیرسن، یاشاییشین بیر بولومودور بوتون یاشادیق‌لاریمیز. آجی‌لار، اولوم‌لر، گووه‌نسیزلیک‌لر؛ شیرین‌لر، دوغوم‌لار، گووه‌نلیک‌لرله آنلام تاپیر.
کوچوره ن :اکبرسعادت
خیام، یک خیابان در اورمیه است و اورمیه مرکز استان تورکنشین آذربایجان‌غربی، استانی در غربیترین سرحدات کشور که سَر همیشه سرفراز ایران است و طبق همان اصطلاح معروف که میگوید« ایش باشا دوشدو» هرگاه لازم باشد نقطه پایان را بر هر مناقشه ومسئله غامض میگذارد و علم استقلال به دست اوست.
رئیس پلیس فتا انتظامی آذربایجان غربی از دستگیری فرد مامورنما، توسط پلیس این استان خبر داد.
فرمانده انتظامی استان از کشف کولرهای گازی قاچاق در شهرستان پیرانشهر با تلاش ماموران گمنام پلیس امنیت اقتصادی، خبر داد.
روشنک مولایی بخاطر انتشار ویدئویی درباره حجاب بازداشت شده است.
ارسال دیدگاه
قوانین ارسال دیدگاه