حکیم ابوالقاسم نباتی گوزللیک شاعری/ اود دوتوب جانیم سراسر یاندی آمما بیلمه دیم…!!!

نباتی « سیّد اُشتبینی » لقبینه مالیک اولموش ، میر یَحیانین اوغلودی۱۱۹۱ هیجری قمری ایلینده آنادان اولموش و جاوانلیق چاغلارین  قاراداغ ماهالیندا اولان اوشتبین کندینده کئچیرمیشدی.

ایشی  اکینچی لیک ایمیش،صفالی باغلاردا ایشله ییب  و مال حئیوان ساخلاماقلا عؤمور سوروب تانری وئره ن روزویا قانع اولارمیش. آنجاق قاراداغین صفاسی و « سیه رود » ماهالینین هاواسی ، «نباتی» نی  گؤزللیکلر قارشیندا ، شعیر یازماغا ماراقلاندیریر…او گئتدیکجه عرفانا داها آرتیق علاقه باغلاییب ، تحصیل ائتدیکده، خیام،مولوی و حافظ کیمی عالیملرین اثرلرین اوخویوب اؤرگه شدی.

سونرالار « اهر » شهرینه گئدیب « شیخ شهاب الدین اهری » نین بقعه سینده  خلوت ائتمه گه باشلادی. دئمک اولار / نباتی اوره گی یوموشاق و دویغولو بیر شاعیر اولدوقدا،عؤمرونون سون چاغلاریندا یئنی دن آنا یوردو « اوشتبین » کندینه قاییتدی.نباتی نین  شعر دیوانی  ۱۲۷۴ اینجی ایلده  تبریز شهرینده  سنگی چاپا یئتیشیب ، و۱۳۴۵ اینجی ایلین اردیبهشت آیی نین اونوندا / نستعلیق خطّی ایله کی « یوسف مشکین قلم » الی ایله یازیلمیشدی.  یاییلدی.

دیوانی عبارتدیر:  بحر طویل،غزل،قصیده،مخمس،رباعی،مستزاد،ساقی نامه و آیری تورکو شعرلر.

نباتی نین  قبیری اوشتبین کندیده بیر اوجا یئرده یئرله شیبدیر. او کندین آداملاری نین دئییشینه گؤره: نباتی  همیشه داغین اوجا بیر یئرینده اوتوروب ، آنا یوردونا و  او کندین گلیش گئدیش یوللارینا گؤز تیکه رک ، چوخ شعیرین اوردا یازارمیش.

اود دوتوب جانیم  سراسر یاندی آمما بیلمه دیم

دل نه دیر؟!دلبر نه دیر؟!باشیمدا بو سئودا نه دیر؟!

شاهباز اوج وحدت،واحد و حیّ و قدیم

خالق اَرض و سما، اول فرد بی همتا نه دیر؟!

صدر ایوان جلالت ، شمع بزم کاینات

آفتاب عرش عزّت،لافتی الاّ نه دیر؟!

شاهد خلوت نشینیم ائتدی رخسارون عیان

عاشق دیوانه گل گؤر ظاهر و اخفاء نه دیر؟!

یئتدی عؤمرون آخیره ، سن بیر نباتی بیلمه دین!

کیمدی گؤزدن او باخان؟! یا  دیلده بو گویا نه دیر ؟!

یازار :اکبر سعادت