“اورمو گولو” عاشیق لارین ساز و سوزونده

“او”موغنّی لرین و هابئله ماهنی اوخویانلارین سوزلرینده ،بیر پارلاق دان اولدوز کیمی شعرلر و سوزلرده  گوزه و قولاغا چارپیردی…

شاید بیله سیز ندن دانیشیرام…

فولکلوروموزدا یئرله شن اورمو گولوندن یازیرام

بیر گول کی دئمک اولار فولکلوروموزدا دیرلی یئری وار و ائله قدیم نن، یاشاییش ساحه سینده اونودولماز نقش ایفا ائدیب، …یاشاییشا معنا باغیشلاییب و بونو ائل اوبامیزین اینامنیدا، شاعیرلرین سوزلرینده ، یازارلارین یازیلاریندا، ،بسته کار لارین و موغنی لرین ماهنی لاریندا ، هابئله آتا سوزلرینده و آنالار اوخشامالاریندا اوخویوب ، گوروب ، ائشیدیب و دینله میشیک. …

اورمو گولو، خالقیمیزین…ائلیمیزین… یاشامیندا اونودولماز بیر نقش ایفا ائدیب… ائلیمیزین قوجامان شاعیرلری اوز قوشمالاریندا و یا خود شعرلرینده عالی درجه ده، اورمو گولونون اوزللیک لری و گوزللیک لری باره سنیده گوزل سوزلر دئییب و اونون اهمیتی لی اولدوغوندان سوز آچیب لار…..حتی ائله دیر کی ایندی مجلیس لرده، ، تویلاردا دیله گلیب سویله نیر.

رحمت لیک دده کاتیب اورمو دنیزی له ایلگی لی اوزل ایز یارادیب دیر کی آدی « اورمو گؤلو » منظومه سی دیر.

اورمو گؤلو عبدالرحمن طیار ( دده کاتب)

اورمو گؤلو اول آللاه آد اولسون
کؤنلوموزده دائیم آللاه یاد اولسون
ائلیمیز خالقیمیز شاد اولسون
خوش دوشونک ، خوش چالیشاق ،خوش بیلک
بیر ـ بیر ایله خوش دانیشاق خوش گولک
اورمو گؤلو باهارلارین ، یازلارین
گؤللرینده،اوردک ،سونا ، قازلارین
اورمو گؤلو من باغلی یام ائللره
نیسان یاغیشینا آخان سئل لره
یاغیش وورسون پاسلاریمیز سیلینسین
چیرکین لیک،گؤزل لیک او وقت بیلینسین
تاریخ بویو اوجالمیشیق اوجاییق
دوشمن لر سانماسین دوشگون قوجاییق
اورمو گؤلو ” دده کاتب ” هله وار
زامان چرخی باشین قاتیب هله وار
اویانماییر بختی یاتیب هله وار
بیر گون اولا یاتمیش بختی اویانا
غیرت آتی مینیب چاپار میدانا

آما آیری باخیمدان… ائلیمیزین و علی الخصوص اورمیه ، نقده ، میاندوآب ، سلماس، خوی ، شاهین دژ و تبریز عاشیقلاری ، اورمو گولونی هئچ بیر زامان اونوتماییب و ایفا ائتدیک لری چاغلاردا، اورمو دنیزی له ان گوزل و ماراقلی قوشمالاری ، گرایلی لاری ، مخمس لری بایاتیلاری و … تویلاردا، و سایر مجلس لرده اورکدن دیله گتیریب و ائشیدن لری ، گورن لری ماراقلاندیریب لار.

دیرلی ائلیمیز و عاییله لریمیز ….قدیم زامانلاردان (اورمو گولو بو وضعیت دن قاباق و کرونا ویروس دان قاباق) ایلین تام گونلرینده مثلن یاز و یای چاغلاریندا اولکه نین هر بیر گوشه سیندن و حتی بولگه میزین هر بیر چئوره سیندن، اورمو گولونون اطرافیندا چادیر قوروب، یئرلشن دن سونرا بو گولون شفاجیل سویوندان و هابئله فایدالی زیغیندان ماراقلانیب و بونونلا برابر، سئویش و شاد لحظه لر یارادیبلار…و صد البت کی او گونلر هئچ زامان یادیمیزدان چیخمایاجاق…

انشالا کی اورمو گولو بیر داها گئچمیش دورومونا قاییدار و ائلیمیز، اونون ، اوجامان دالغالارینین موسیقیایی سسلرینی ، دورنالارین قانادچالماق لارینی ، ائشیدیب و گورسونلر .

یئنه گلدیم یانینا خسته جه جانین تالانیب

ساحیلین گوزدن ایتیب دیر یئرینه دوز یارانیب

سنی گورمه ک دا خیالدیر کوکونو دوز بورویوب

سنه گوز یاشی گتیردیم، گوزومه قان جالانیب

دالغالانسایدین ایر سنده یاشاردیم یئنیدن

بیلدیرردیم کی گویون رنگی نه لر نن بویانیب

سن بو تورپاقدا، گولویدون یا گولویدون نه بیلیم

آنجاق ایستکلی ائلیم شوهرتی سن لن قازانیب

قورولوبدور سینه م ایچره یارالار، سن ده بیری

سنه باخدیم یاخیشیم یاندی یاناغیم سولانیب

دئدیلر پسته ی خندان اکیلر تورپاغینا

پسته، آغلار گویرر، گور نه فیکیرلر بولانیب

قوجاغین آچ کی گلیم من ده اوزوم بیر گمی تک

گمی لر تورپاغا باتمیش دوز ایچینده اوتانیب

یازار: اکبرسعادت