یزدان عمی نین مشروطه خاطره سی

قارتال نیوز/ البته دوزون آختارساز اصلینده مقصد ماهنی دئییل، تکجه یزدان عمی نین یئنی ـ یئنی سوزلرین، ایشلرین ائشیدیب گورمک دیر. ایری اوتوروب دوز دانیشساق یزدان عمی نین ساواد سیز لیغینا باخمایاراق هرده ن ائله سوزلر دانیشیر، ائله سوزلر دئییر، ائله زادلاردان خبر وئریر کی آز قالیرسان بوینوز یئرینه نه بیلیم نه چیخارداسان!! همی ده یزدان عمی شهرین آغ ساققالی اولدوغونا؛ هرده نـده آت گئتمز ایشلر ده ن، یئرلرده ن خبر وئرمه سینه گؤره شهر ایچینده یامان حؤرمتی وار.

من ایللر بویودرس اوخوموشامسا اونون قده ر بیلسئیدیم بلکه ده ایندی مجلیسه زادا کاندیدا زاد اولاردیم. یادا بیلمیره م بعضی ایشلرده الیم اولاردی. بعضی ایشلر ده دئینده اختلاس میختیلاس زاد یوخ ها فیکریز گئتمه سین بعضی ایشلر دئینده فیکریم بعضی ایشلردیر…آنجاق اوزون سؤزون قیساسی بو کی یزدان عمی یامان کیشی دی.

دونن یئنه ده هر گونه تای یولوموامام خیابانیندان شمالی خیام دان  یزدان عمی نین اوتوراجاق یئریندن سالدیم. یزدان عمی دئمه، دئ چرچیل. دئ هیتلر، نه بیلیم دئ آللاهین یانار اودو. منی گؤرمکده اؤزونو یئتیریب: آی ژورنالیست بس سن هارداسان؟ دئدی اوتور بیر منیم یانیم دا گوروم آی بالا

ـ آی ژورنالیست سنی آللاه یئتیردی.

ـ نه اولوب یزدان عمی؟ دئیه یزدان عمی گؤسده ره ن یئرده اوتوردوم.

-آی مهندیس بیلمیره م بو بعضی آداملار نییه منده ن اَل چکمیرلر!!

ـ آی یزدان عمی منی جانا گتیردین آخی، دئمیرسن نه اولوب؟ اطرافدا اوتورانلار­سا هامیسی قولاقلارین شوشله میشدیلر گؤرسونلر عمی نه دئیه جک.

یزدان عمی  قاوالی قویدو یئره بیر منه باخیب بیر جمعیته باخیب اوزونو منه ساری توتوب: مهندیس من ستار عمی ایله بیرلیکده مشروطه زامانیندا استبدادلا دؤیوشموشم. بونو سن هامیدان یاخشی بیلیرسن کی! دئدی.

بوغازیم بیچیلمیشدی. من هاردان بیلیردیم یزدان عمی ستارخانلا بیرلیکده مشروطه زامانی دؤیوشوب؟!!

ـ  آخی… یزدان عمی من…

ـ هه، ژورنالیست  بیلیره م سن ائله اؤزونده اوزامان ستارعمی نین مجاهید لرینده ن بیری ایدین.

من لاپ گیج قالمیشدیم. بو سؤزون جاوابیندا نه دئمه­لی اولدوغومو بیلمیردیم. سونرا یزدان عمی اوزونو اطرافدان هوروت هوروت اونا باخانلارا توتوب: ژورنالیستین بئله لیگینه باخمایین ها، بو اؤزو یامان ایگید آدامدی. واقتیندا سیزه دئیه ره م او زامان بو نه ایشلر گؤروب دئیه اوجا سسن بیر چال اویناسین اژدرعمی ماهنی سین اوخودو….

ـ هه، ژورنالیست دئییردیم، دونن سنده ن سونرا بیر نفر بیلمیره م کیمین سؤزونه آلدانیب بوردا اوتورموشدو سفئه له ییردی. آلتدان ـ آلتدان منیم اوزومه باخیب، یئنه سؤزونه بئله داوام وئردی: ژورنالیست منی ایسته مه ین آداملار ایسته ینلریمده ن چوخدولار. اونلار چالیشیرلار منیم آبیریمی گؤتورسونلر. هئچ بیریسی منی گؤزلری گؤتورمور. بیلمیرسن یامان پیس زامانا اولوب. یئنه منیم اوزومه باخیب سؤزلرینه منده ن تایید ایسته ییب باشیمی آشاغی اوستده آپاردیقدا یئنه سؤزونون آردیندا: یادیندا اولسا اوندا من ستار عمی ایله مشروطه مجاهید لرینده ن بیری ایدیم. بئله دی یا بئله ده ییل؟دئدی.  یئنه باشیمی آشاغی اوستده آپاریب سؤزونو دامغالادیم.

ـ ژورنالیست اوگونو هئچ یادیمدان چیخماز ستار عمی کربلایی حسین خان باغوان ایلن دؤیوشه باشلاری قاریشمیشدی. باشچی لاردان بیلمه دیم هانکیسی منی چاغیریب: آی یزدان سنده ن سونرا هئچ کیمه اینانمیرام، آتینی مینیب بو نامه نی سردارا چاتدیرمالیسان. دئدی. منده تئز قیر آتی مینیب باشچی نین سؤزونو یئرینه یئتیرمک اوچون یوللاندیم. توپ توفنگ گولله سی گؤیده ن نئجه یاغیر، سانکی یاغیشدی. یزدان عمی دانیشا ـ دانیشا بیرگؤزوده منده ایدی. دانیشماغا قیزیشاندا بیلمزدی هاردان دانیشیر نه دئییر. منده بیلمیردیم دانیشام یوخسا عمی نین سؤزلرینه قولاق آسیب اونون تاییدینده باشیمی توولاییم!! گاهدان بیر گؤز آلتی اطرافدا اوتورانلارا گؤز دولاندیریردیم. هامیسی ائله گؤزلرین یزدانین آغزینا تیکمیشدیلر ائله بیل اونون آغزیندا ایندیجه قیزیل تؤکوله جک.

ـ ژورنالیست فیکرین منده؟ قوشبازلیق ائله مه منه قولاق آس دئیه عمی، سؤزلرینه داوام وئردی. آغای ژورنالیست شیرین جانیوا آند اولسون آتین اوستونده ائله اوتورموشام، سانکی هیتلر تانک اوستونده اوتوروب اوردوسونا روسیه یه فرمان حمله سی وئریر. نئجه آتی میزله ییره م. توپ توفنگ گولله سی ده منه طرف گلدیکده باشیمی اَییب ردده وئریره م. بیلمیره م نه قده ر چکدی من اؤزومو سردارا چاتدیریدیم. گؤزدوم سردار شیرین جانی ایله چالیشیر. مسلسل اَلینده دوشمنین جانینا زلزله سالیب. آنجاق پیس کؤهده اؤزومو سردارا چاتدیریب آتدان یئره یئنیب: سردار سیزه مکتوب گتیرمیشم دئیه اونا یاخینلاشدیم.

سردار دؤیوشمکده ن اَل گؤتوروب منه ساری دؤندو، ائله دؤندو ساندیم ایندیجه منی دوشمنله ده ییشیک توتاجاق. آنجاق مکتوبو سردارا ساری توتوب احتیرام ائله دیم. سردار بیر منه باخیب بیر قیراقدا باغلادیغیم آتا باخیب ساغول مجاهید سنی مین یاشا دئییرکن منده ن: بو آتلا گلیب سن؟ سوروشدو. احتیراملا اَلیمی سینه مه قویوب بلی سردار بو آتلا گلمیشم دئدینده گؤردوم سردارین آغزی آچیق قالیب. یزدان عمی سؤزلرینین بوراسینا چاتاندا یئنه اوزونو منه ساری توتوب، ژورنالیست اؤزو سرداری منده ن یاخشی تانییاردی. اینانماساز اوندان سوروشون دئدی. آردیندا هوروت ـ هوروت اونا باخانلارا: هه، قارداش سردار منده ن: مجاهید بس دئمکده ن بو آتلا گلیب سن؟ سوروشدو.

یئنه احتیراملا اَلیمی سینه مه قویوب: بلی سردار بو آتلا گلمیشم دئدیم. سردار تعجوبله منده ن: بس بو آتین باشی هانی؟ سوروشاندا، آرخایا باخدیقدا بیلدیم آتین باشین توپ گولله سی آپاریب. یازیق آتین باشیندان نئجه قان گئدیریدی. آللاه سیزی ایناندیرسین، ژورنالیست یاخشی بیلیر، آز قالدیم اوتاندیغیمدان یئره گیره م.  سردارا نه دئیه جه ییمی بیلیمیردیم. تئز فیکیرله شیب: سردار آتدا سیزین فدایی لریز ده ندیر. اودا گره ک باشین سیزین یولونوزدا وئرسین دئیه سردارا ساری دؤندوم. سردار منی قوجاقلاییب: مجاهید منیم سنه تای بئش ـ آلتی دؤیوشه نیم اولسایدی، ایندی من اؤزوم گلیب بوردا دؤیوشمزدیم دئدی.

یزدان عمی منده سؤزلرینه تایید اوموردو. چاره سیزلیکده ن: هه، یزدان عمی او گونلر اولایدی کاش. دئدیم. یزدان عمی فاتئح سردار کیمی قاوالی باشینین اوستونده فیرلادیب: گؤردوز؟ گؤردوز یالان دئمیره م؟ دئدیم ژورنالیست گلسه منیم سؤزلریمی تایید ائده جک دئدی. آنجاق کی یزدان عمی سئویندیگینده ن قاناد چیخاردیب اوچماق ایسته ییردی.

ـ یزدان عمی دئمه دین آخی دونن کی اوغلان نه دئییردی؟  هه، ژورنالیست، دونن بورا گلن اوغلان منه: آخی سن کی بئله دئییرسن، بو سؤزلره شاهیدین ده واردیر سوروشوردو. منده : صاباح یئنه ده گل، ژورنالیست گلسین اوندا گؤره رسن یالان دئمیره م دئدیم جاوابیندا. سونرا اوزونو اوتورانلارا توتوب: آی جاماعات گؤردوز کی من دئدیکلریمی ژورنالیست ده تایید ائله دی دئدی.

یاواش ـ یاواش گئتمک واقتی چاتمیشدی. او گونوده ایش یئرینده چوخ یورولموشدوم. یزدان عمی نین قاوال چالیب اوخوماق پولون وئرمک اوچون اونا ساری یؤنلدیم.

ـ ژورنالیست هارا اوتور هله سنله ایشیم وار. پولونودا قوی جیبینه سونرا آلارام دئدی. چوخ دئینده ن سونرا عمی یامان یورولموشام صاباح گؤروشه ریک دئیه عمی ایله گؤروشوب، ساغوللاشیب، یولا دوشدوم .دوزون آختارساز عمی نین سؤزلری منی ائله توتموشدو کی سانیردیم من ائله ارزومده او گونو یزدان عمی ایله دؤیوش مئدانیندا ایمیشم….

یازار: اکبرسعادت