قورخولو باش سلامت قالار

قارتال نیوز / بیردن باشینا خطاب دئدی:آی باشیم!!! ایندی یئتمیش ایلدی سنی ساغ سلامت ساخلامیشام. بوگونه کیمی سنه بیر چیرتیکده بئله دیمه ییب. ائله بیل سنی بو دونیادان، اوبیری دونیایا ساغ سلامت آپاراجایام…

قوجانین بو سوزلرینی یونگول فیکیر، گوزو آچیق بیر جوان ائشیتدی…جوان اوز اوزونه دئدی: هه… گور قویدوم سن او دونیایا ساغ آپاراسان. اونو ائله ووروم یاریلسین کی او دونیادا دا او آغری یادیندان چیخماسین…

بو سوزلری دئییب و اوزاقلاشدی و قوجانین باشینی یارماق اوچون فورصت دالیجا گزیردی.

گون لرین بیر گونو، یایین ایستی چاغلاریندا، قوجا سوسوزلوقدان یانان زمی سینی سوواریردی. جوان اوغلان گوردو یاخچی بیر فرصت دی، تئز سویون باشینی اوجسوز بوجاقسیز بیر شورانلیغا چئویریب، الینده کی آغاجا گووندی که کیشی بیر سوز دئسه، آغاج ایله ائله وورسون کی باشی چاپیلسین…

قوجا باخدی گوردو سو زمی یه چاتمامیش، کسیلدی.هر یانی آختاریب گوردو ائله بیل اوستدن کسیلیب.باش آلدی یوخاری گئتدی. گوردو کی بله/ بیر جوان اونون سویونو بیر اوزون شورانلیغا بیراخیب

قوجا، جوانا چاتماق همن / آغاجی جوانین الینده گوروب، قورخودان سلام وئریب دئدی:باشینا دولانیم آی اوغلان، بو شورانلیق قورتاراندان سورا، زحمت اولماسا، سویون اوزونو منیم زمی مه طرف اوتور، چونکی منیم زمیم ده سوسوزدی و سوسوزلوقدان یانیر…

جوان، قوجانین ادبلی- ارکانلیغی نی گوروب و سوزلرینی ائشیدیب، آغاج الینده دوردوغو یئرینده قالدی. بیر آزدان اوزونه گلیب قوجانین اوز گوزونو اوپوب دئدی:عمی منی باغیشلا… من سهو ائله میشم. من ایسته ییردیم سن منه آجیقلاناسان من ده سنین باشینی یارام… نیه کی او گون دئییردین: آی باشیم!!! سنی او دونیایا ساغ سلامت آپاراجایام. بودا منه آغیر گلدی و ایستیردیم سنین باشین یارام…  ایندی گوردوم کی سنده بو یوموشاقلیق و بو گوزل رفتار وار و نه تکجه بو دونیادا، بلکه او دونیایا دا سن اونو ساغ و سلامت آپاراجاقسان….

جوان اوغلان، قوجادان حلال لیق ایسته دی و سویون اوزونو او قوجا کیشی نین زمی سینه طرف چوندردی… اودو کی دئییرلر: قورخولو باش سلامت قالار….

قایناق: آذربایجان فولکلورو / کوچوره ن: اکبرسعادت