بایقوش/ بایقوش کیمی نیه آغلیرسان؟

قارتال نیوز؛ بعضی یئرلرده جاماعات آراسیندا بئله بیر دوشونجه وار کی دئییرلر: بایقوش بدبختلیک گئتیردیگی اوچون، اونو اینجیدیب داش آتمازلار.چونکی دئییرلر اگر بایقوشو اولدوغو یئردن قوووب و دیده رگین سالسان، پیس نتیجه لر گوررسن.ائل آداملاری بیرده دئییردیلر کی: بایقوشا بیر نوع حورمت سیزلیک حسی وار کی اودا : قورخو دی… یعنی اگر بایقوش قورخسا، اونا حورمت سیزلیک اولار.بایقوش باره ده بیر سیرا روایت لر وار کی گویا بو حیکایه لر و روایت لر تکجه حیکایه یوخ، بلکه عمل ده ده باش وئریب و صحتلی ماجرادیلار.قوجاآتاآنالاریمیز بایقوشلا مناسب بیر روایتی حضرتی سلیمانا باغلامیشلار و گویا بایقوش او حضرتین سورغو سوال لارینا دوزگون جاواب وئردیغی اوچون، الله طرفیندن رحمت قازانمیشدیر…

بایقوش اول لر، سای قوش ایمیش. سای سوزو ائلیمیزده آییق و هوشلو معناسیندا.بیرده کی بعضا دئییرلر سای سوزو، همان سایاخ لوغتیندن دی.بلکه بو قوش حضرتی سلیمانین سورغولارینا دوزگون جاواب وئردیغی اوچون اونا او زامان سایقوش آدی وئریب لر.بایقوش بیرده دئییرلر کی: تکلیق و تنهالیق نشانه سی دی.مثلا دئییرلر فیلان کس بایقوشا اوخشاییر.یعنی بایقوش کیمی تک دی. یا دئییرلر: آی فیلانی بایقوش دئییل سن کی تک و تنها قالیب سان.ائلدن ایراق گزه ن آداملارا دئییرلر: ائله بیل بایقوش کیمی تک قالماغی سئویر.اوزونه یاخچی باخماییب و اوزونو بئ کئف سایان آداما دئییرلر: بونا باخ، لاپ ائله بایقوشا بنزیر و یئرسیز آغلایان شخص لره دئییرلر: بایقوش کیمی نیه آغلیرسان؟و یا دئییرلر: بابا ائله فیلان کس بایقوش کیمی آغلاماغی اوزونه پئشه ائلییب.یا مثلا یاشاییش یئرینه اهمیت وئرمه یه ن و ائوده اوتوران آداما دئییرلر: بودا بایقوش کیمی ویرانلیق سئویر!

خئیرده و شر ده گورونمه ین مسجیده آیاق باسمایان آداما دئییرلر: فیلان کس، فیلان بایقوش نان یولداشلاشیب! بیرده دئییرلر: ناماز اهلی اولمایان آدامی بایقوش قارقیشلار و اونون اولمه سی نی آرزولار…

بایقوش حقیقتا کی هم آتالاریمیزین سوزلرینده و هم ده کی فولکلوروموزدا بویوک یئری وار… و ائله قدیم دن بیر سیرا حیئوان لار اهمیت لی ایمیش لر آتابابالاریمیزین سوزلرینده…

***

یازار: اکبرسعادت