مهدی باکری‌نين حیات حکایسی

۱۳۳۳ه. ش.-ده میاندوآب‌ شهرستانیندا ایمانلی و مذهبلی بیر خانواده‌ده آنادان اولدو. اوشاقلیقدا ایمانلی بیر خانیم اولان آناسینی الدن وئردی. ابتدایی و متوسطه تحصیلینی اورمیه‌ده قورتاردی و دبیریستان دؤورونده (قارداشی علی باکری‌نین ساواک دژخیملری طرفیندن شهید اولدوغو زامانلار) سیاسی جریانلارا قوشولدو.

دیپلم آلدیغیندان سونرا قارداشینین شهادتیندن چوخ ناراحات و متأثر اولسا دا دانیشگاها وارد اولوب مئکانیک مهندسلییی رشته‌سینده تحصیل آلماغا باشلادی. تبریز دانیشگاهینا وارد اولدوغو اول گونلردن بو دانیشگاهین مبارز فردلریندن بیریدی. او قارداشی حمیدی ده اؤزو ایله بو شهره گتیردی.

شهید باکری، الده‌کی محرمانه سندلره اساساً شرقی آذربایجاننین امنیت سازمانی (ساواک) کنترل و مراقبت اولونماقدایدی.

بیراز سونرا حمیدی آیری مبارزلر ایله ارتباطدا اولماق اوچون خاریجه‌یه یوللادی کی اؤلکه‌نین ایچینده‌کی مبارزلره آتشلی سیلاح (سلاح گرم) گوندرمکده فعال اولسون

شهید مهدی باکری حضرت امام خمینی‌نین (ره) اعلامیه‌سیندن تبعیت ائدیب – تهراندا افسر وظیفه اولسا دا – سربازلیقدا قاچیب گیزلین یاشادی و اسلامی انقلابین پیروزلوغو اوچون مختلف فعالیتلر ائله‌دی

شهید باکری فتح المبین عملیاتیندا نجف اشرف تیپینین معاونی اولاراق استعداد و شفقتی ایله پیروزلوقلاردا تأثیرلی اولدو. بو عملیاتدا بیر گردان محاصره‌یه اولونموشدو کی او تایسیز شجاعت و تدبیری ایله بیر تعداد نفر ایله اونلاری محاصره‌دن چیخاردی. ائله بو عملیاتدا رقابیه منطقه‌سینده گؤزوندن یارالاندی. بیر آیا یاخین سونرا بیت المقدّس عملیاتیندا (همان مسولیتده) شرکت ائدیب اسلام سپاهینین بعثی متجاوزلره پیروز اولماسینا شاهید اولدو.

بیت المقدس عملیاتینین ایکینجی مرحله‌سینده بئلیندن یارالاندی. یارالاری چوخ اولسا دا عملیاتین اوچونجو مرحله‌سینده، بسیجی قارداشلاری بی‌سیم ایله هدایت ائتمک اوچون فرماندهلیک قرارگاهینا گئتدی.

رمضان عملیاتیندا عاشورا تیپی فرماندهلییی سمتینده، عراق توپراغیندا آمانسیز ساواش آچیب گینه ده یارالاندی آما او هر دفعه یارالاندیقجا جبهه‌لرده داها جیدّیتلی حاضر اولوب نیرولارین تجهیز، سازماندهی و هدایتینده و عملیاتلارین طراحیسینده گئجه‌لی-گوندوزلو یورولمادان چالیشیردی

مسلم ابن عقیل عملياتيندا، اونون عاشورا لشکرینه فرماندهلییی و سلحشور رزمنده‌لرین ایثارلاری سایه‌سینده اسلامی ایراننین گؤزل توپراغینین بؤیوک بیر بؤلومو و نئچه ایستراتژیک منطقه آزاد اولدو.

شهید باکری مقدماتی، بیرینجی، ایکینجی، اوچونجو و دؤرونجو والفجر عملیاتیندا، عاشورا لشکری فرماندهی اولاراق غیرتلی و فداکار بسیجیلر ایله متجاوزلر ایله ساواشدا اؤزوندن بؤیوک آماده‌لیک و هر طرفلی ایثار گؤستردی

خیبر عملیاتیندا قارداشی حمید اوجا شهادت درج‌سینه ناییل اولدو. اونا خاص علاقه‌یس اولسا دا خانواده‌سینه تئلئفون ائدیب غمگینلیک گؤسترمه‌دن بئله دئدی: حمیدین شهادتی آللاهین لوطفلریندن بیریدیر کی خانواده‌میزین حالینا شامیل اولموشدور. و خانواده‌سینه بیر نامه‌ده بئله یازدی:
من حمیدین وصیتی و آرزوسو اولان کربلا یولونون آچیلماسی اوچون جبهه‌لرده قالیب شهیدین هدفی و یولونا دوام ائده‌جه‌یم اسلام پیروز اولونجایا قدر

ساواش مئیدانلارینین حساس شرایطینده چوخ چالیشدیغی اوچون قارداشینین تشییع جنازه‌سینده شرکت ائده بیلمه‌دی؛ انقلابدان قاباقکی چوخ خطرلی گونلرده سیاسی مبارزه‌لرده و جبهه‌لرده اونونلا برابر جانفشانلیق ائدن همرزم قارداشی.

شهید باکری و عاشورا لشکرینین نقشی، خیبر قهرمانلیق حماسه‌سی و مجنون جزیره‌لرینین تصرّفونده هابئله، اونلارین دشمنین توانفرسا پاتکلری قاباغینداکی مقاومتلری، هئچ کسه گیزلین دئییل‌دیر

بدر عملیاتینین مقدّماتینین آماده‌سازلیق مرحله‌سینده گونلر یاواش یاواش گئچسه ده مهدی بوتون نیرولاری مردانه وعارفانه بیر ساواش اوچون تشویق ائدیب هیجانلاندیریردی؛ بیر کامل مرشد و واصل عارف تکین، آللاه یولوندا جهاد ائدنلر و شهادت‌سئورلرین بیلیب ساواش مئیدانیندا عمل ائتمه‌لری لازم اولان شئیلردن دانیشاردی.

وصیتنامه
عزیزلریم، اگر گئجه‌لی-گوندوزلو آللاها شکر ائتسک کی اسلام و امام نعمتینی بیزه عنایت ائتدی، گینه ده آزدیر. آگاه اولاق کی دوز نیّتلیلیک و عملده خلوص تکجه چاره‌میزدیر. بیلین کی اسلام بیرجه نجات و سعادت یولوموزدور. همیشه یادینیزدا آللاه اولسون و اونون فرمانلارینا عمل ائدین. امامین دالیندا دورون و اورکدن اونون مقلّدی اولون. دوعا، اباعبدالله و شهیدلرین مجلسلرینه چوخ اهمیت وئرین کی سعادت یولو و آخرت توشه‌سیدیر. هر زامان زینبی و حسینی تربیت اولون و اونلارین رسالتینی اؤز رسالتینیز بیلین.اوشاقلارینیزی دا ائله تربیت ائدین کی اسلام اوچون ایمانلی و شهادت‌سئور سربازلار و حضرت ابوالفضلین (ع) وارثی و صالئح علمداری اولسونلار